Johan Veenstra
Stellingwarver schriever en verteller

Boeken

Plaetst op 21 jannewaori 2023.

Een peer daegen leden he’k de prachtige film In the valley of Elah zien over de verschrikkings van de oorlog in Irak. Gisteraovend he’k de al lieke mooie film Brothers zien over de verschrikkings van de oorlog in Afghanistan. Een helikopter mit Sam an boord wodt daelescheuten in Afghanistan. De kaans dat hi’j nog leeft is klein. Sam zien breur Tommy steunt Sam zien vrouw en de beide kiender. Ze vienen mekeer hiel aorig en nao verloop van tied meer as aorig. En dan komt Sam toch nog weeromme. De ontreddering bi’j iederiene is groot. Ik hadde beide films wel eerder zien, mar ze bin zo ontroerend mooi da’k ze over een peer jaor gerust nog es weer zien kan. Zokke films maeken je leven rieker.

Vandemiddag he’k acht potten hunning ophaeld bi’j mien aachterneve en iemker Piet an de Heirweg in Wolvege. In zien huus woont pelisieman Rik Smit in mien laeste boek Et liek in de Lende. Ik hebbe d’r een peer bakkies thee dronken en we hebben genoeglik bi’jpraot. Bi’j boekhaandel Zwikstra he’k et laeste boek van mien vrund dokter Jan de Haan kocht: Een zondagskind van glas. Butendat he’k drie boeken besteld: Zij die moeten sterven van David Lagercrantz. Et zesde diel van de beroemde Milennium serie. En dan ok nog Vrouw en vrijheid van Jolande Withuis en De eerste bloemlezing van de Nederlandse po√ęzie van Tsead Bruinja. Steun de kleine boekwinkels en koop je boeken daor. Bolcom reddet him wel.