Boekemark

Ik hebbe vandemorgen eerst een Dutch Apple Bread bakt en doe bin ‘k op ‘e fiets stapt veur een tochien van 42 kilemeter. Ik bin bi’j de Kuunder langesgaon naor de sluus onder Ni’jberkoop en doe over Berkoop, Buil en De Oosterstreek naor Noordwoolde. Daor he’k an de Dwasvaortweg in de tuun van De Buytenplaets een pot darjeeling thee en een croque madame had. Lekker! Vervolgens bin ‘k naor Berkoop gaon. Daor was vandaege de streekmark en veur et gebouw van de Stellingwarver Schrieversronte was een grote boekemark mit veur et grootste pat twiedehaans boeken. Daor he’k een peer bakkies thee kregen. Hieronder een foto die ‘k daor maekt hebbe. Op ‘e foto staon Fettje Alten en Hendrik Betten, die de grote boekekraom deskundig bemanden. Zi’j kregen vandemiddag Jack Werkman, de ni’je burgemeester van Oost-Stellingwarf, ok op vesite.