Boekbespreking

Vandemorgen besprak Martsje de Jong mien ni’je boek Naozoemerlaand op Omroep Frieslaand-radio. Ik kwam d’r hatstikke goed of, ze was vol lof over de verhaelen. Ze hadde et zels dat ik een outsider van de Gysbert wezen kon. Now ja, mar dat is nogal wat. Ik daenke aenlik daj’ veur die hoogste Friese literaire pries in et Fries schrieven moeten. Mar et is een groot komplement. Daornao bin ‘k naor Vrouwkje in Hooltpae gaon om heur de fielseteren mit heur verjaordag. Daor heurde ‘k dat d’r op ‘e lekaole omroep Odrie vandemorgen ok slim positief over Naozoemerlaand praot was. Dat is mooi! Ik hebbe thuus tussen de middag gauw een plakkien bolle eten en doe bin ‘k naor de Eupen Stal in Berkoop gaon. Ik bin now weer thuus en kriege zo een uutvanhuzer. Aachternichte Ria uut Papendrecht is an disse kaant. Ze et hier vanaovend bi’j mi’j en ze blift hier ok te slaopen. Dat ik zal zo de stamppot zoerkool in de ovend zetten.