Johan Veenstra
Stellingwarver schriever en verteller
Plaetst op 4 feberwaori 2025.
Al veurdat et officieel uutkommen was, ha’k et boek Stormvloed 1825 van Arnoud van de Ridder al besteld. Et is een prachtige herinnering an de waetersnoodramp van 200 jaor leden. Et boek zicht d’r prachtig uut in een had kaft. Et is uutgeven deur Museum Warkums erfskip. Et gaot in et biezunder over de ramp in Frieslaand. West-Stellingwarf komt ok hiel uutvoerig an bod. In et boek staon een protte foto’s, ofbeeldings van oolde schilderi’jen en prenten, tekenings en tebellen. Een wondermooi boek. Lees dit boek en beleef de ramp van 1825. Et aorige is dat d’r een foto in et boek staot die deur mi’j maekt is. Van de Ridder nam een schoffien leden kontakt mit me op. Op wwwStellingPlus hadde hi’j een foto van me ontdekt in de serie Stellingwarfs in et wild. Een foto van et Museum ’t Olde Maat Uus in Gieteren. In feberwaori 1825 spoelde de oolde boerderi’je, die doe op dat plak ston, vot in storm en waeter. Op 6 meie 1826 ston d’r een ni’je boerderi’je. In 1986 wodde die doe vanzels al oolde boerderi’je opknapt en now zit et museum d’r in. Wat aorig dat die foto van mi’j mit een keurige bronvermelding in et boek staot.