Johan Veenstra
Stellingwarver schriever en verteller
Plaetst op 20 jannewaori 2025.
Et is vandaege Blue Monday, de meerst trieste dag van et jaor. En dat is vandaege in alle opzichten ok zo. Vandemorgen he’k een peer uurties overleg had bi’j de Schrieversronte in Berkoop. Dat was wel gezellig, mar veerder is et weer iene grieze en diezige boel vandaege. Ie zollen d’r zo staorigan mal van wodden. En ja, dan is de wereld d’r vandaege nog een stok griezeliger op wodden. Et oe zo kristelike Amerike het een op macht beluste oplichter, krimineel, liegepoede en hoereloper as 47ste president keuzen. Daor biwwe mit mekeer mooi klaor mit. Gao d’r mar vanuut dat de demekraosie daore van binnenuut uuthold wodt. De rechterlike macht krigt et te verduren en journalisten, kollumnisten en tekeners van spotprenten moe’n op heur tellen passen. Butendat wil hi’j an ’t laantienpikken. Kannede, Gruunlaand, Panama. Percies etzelde wat Poetin dot en Xi nog doen gaot. Wie van de drie is et argste geveer veur de wereld? Hopelik is de demekraosie in Amerike stark genoeg om dit vier jaor overleven te kunnen.