Bloemlezing

Vandemorgen bin ‘k om half twaelf in de trein naor Liwwadden stapt. Ik hebbe een keuzedag bruukt. Dan is et vanzels niet zo veurdielig en gao naor Liwwadden. Amsterdam was in wezen veurdieliger, mar ik mos now ienkeer naor Liwwadden en ik hebbe nog zat van die keuzedaegen. De boel is ophoopt deur de coronapandemie. In Liwwadden he’k eerst wat drinken en een heerlike tosti thús had in et resteraant van et Fries Museum. Doe bin ‘k naor Intersport west en koop wintersport thermo ondergoed. En vervolgens bin ‘k naor kefé De Gouden Leeuw in et gebouw van Tresoar gaon. Daor was vandemiddag een gedichtemiddag naor anleiding van et uutkommen van De eerste bloemlezing van de Nederlandse poëzie 100 gedichten uit het Koninkrijk van 1945 tot nu. De zo staorigan al beroemde bloemlezing is saemensteld deur Tsead Bruinja en wodt her en der in et laand prissenteerd. Vandemiddag was dat dus in Liwwadden, morgen in Grunningen. Et was een prachtige middag, et kefé zat vol. Tsead dee goeie zaeken en verkocht een protte bundels. De leiding was daor in hanen van Wieke de Haan die ‘k nog kenne van It Fryske Boek. Et geluud wodde verzorgd deur Bob de Boer die ‘k nog kenne van Omroep Frieslaand. Doete Stenekes interviewde Tsead en zi’j leesden beidend ok gedichten veur van dichters uut Frieslaand die in de bundel staon. De meziek was van Hiske Oosterwijk. Ik moch mien gedicht Mien oolde huus dat in de bloemlezing staot veurlezen en ok de vertaeling in et Nederlaans. En dan nog et ni’je gedicht Sturken. Onderwegens naor et stesjon he’k in de Febo in Liwwadden nog een brotien kroket oppeuzeld.