Bloemen

An et begin van de middag kwam d’r een man an de deure mit een prachtige bos bloemen veur mi’j van de karke omda’k in et ziekenhuus legen hadde. Ik stelle dat hiel arg op pries. Hiel mooi! Ik hebbe vandaege een kollum schreven over die aekelike en iederkeer rattelende infuusdingen in et ziekenhuus. Kun die verhipte dingen niet wat beter maekt wodden? Van uutgeveri’je Querido in Amsterdam stuurden ze me een drokproef die ‘k vandaege naokeken hebbe. Et gaot om mien gedicht Mien oolde huus en de vertaeling Mijn oude huis. Dat gedicht staot in mien dichtbundel Sletel parredies uut 1994. Et wodt now opneumen in De eerste bloemlezing van de Nederlandse poëzie 100 gedichten uit het Koninkrijk van 1945 tot nu. De bloemlezing is saemensteld deur Tsead Bruinja en wodt in november deur Querido uutgeven. Ik bin slim vereerd!