Bloemedaegen

Gao’we vandaege fietsen of mit de boot veren? Dat was eerst even de vraoge. Mar we bin naor de laeste dag van de jaorlikse Bloemedaegen van Anna Paulowna en Breezaand west. Et was schitterend. Eerst biwwe naor de Pooldertuun  west, een soortement Keukenhof in et klein. Mar toch nog best wel een groot park. Wat was et daor mooi! Wat een verschillende soorten en kleuren tulpen, tietelozen, blauwe droefies, annemonen… As d’r al een hemel is dan kan die niet mooier wezen as de Pooldertuun in Anna Paulowna! Daornao hewwe daor op een terrassien wat drinken mit appelgebak had. We hebben een snuffelmark bekeken en we hebben de karke van binnen bekeken. En doe biwwe in de auto stapt veur een lange route deur Anna Paulowna en Breezaand en de omkrieten. Versierde straoten, mozaïeken en al die mooie bollevelden. Op ien perceel weren ze de tulpen al an et koppen. Dat moet netuurlik, mar et is wel zunde van al die mooie bloemen. Een mozaïek mit et petret van Peter R. de Vries hadde de eerste pries wunnen. We hebben om goed vier ure waarm eten had in resteraant De zingende wielen in Den Oever. Hieronder een foto die ‘k maekt hebbe in de Pooldertuun. Wat een mooie dag!