Blij met bomen

Vandaege he’k verhaelen rippeteerd veur een optreden van morgenmiddag in Liwwadden. Butendat kree’k et Sunderklaos Bonneboekien van de Wolvegester winkeliers in de busse. Veurop et boekien staot een foto van Sunderklaos en drie Zwatte Pieten. Zo zwat as roet! Dat is nog es durven in disse jaoren van akties tegen Zwatte Piet. Daor trekken de Wolvegester winkelmannen heur bliekber niks van an! Ik hebbe ok overleg had mit de gemiente over de dag dat mien ereburger-petret daor onthuld wodden zal. Ik zal dan ok een toespraoke holen.

Doe ‘k een peer weken leden optreden moch in Dwingel bi’j Tael an Taofel kree’k daor et boek Blij met Bomen van Jan van Ginkel as kedogien mit naor huus toe. Wat is dat een mooi boek! Ik hebbe et now hielemaole lezen.Van Ginkel schrift alderhaande aorige dingen over een veertig bomen en struken die een protte in de Drentse dörpen veurkommen. Et boek is prachtig veurzien van foto’s en d’r staon gedichten in van tal van Drentse dichters. Butendat wo’n d’r alderhaande aorige dingen over de bomen verteld. Vanzels ok de naemen in et Drents, mar ok hoe ze bruukt wodden in de volksgeneeskunde. Puree van wilde kestanjes is trouwens heerlik bi’j vleis van wild, de thee die trokken wodt van klimopblaeden is goed veur verkooldhied en de bloemen van kannegies (in et Nederlaans: hondsroos) wodt bruukt veur parfums en ies en warken hielende op wonties.