Biesterbaorlik mooi zoemerweer

Ik wodde vandemorgen om vuuf ure wakker en doe docht ik drekt da’k d’r in mien dagboekstokkien van gister wat in ommeproesd hadde. Ik wus ok votdaolik wa’k vermoedelik verkeerd daon hadde en dat bleek ok zo te wezen. Ethel Caterham, die Engelse vrouw die vleden weke 117 jaor wodde, is geboren in 1909. Etzelde geboortejaor as dat van mien moeder. En Henny van Andel-Schippers is geboren in 1890. Ik argere me vreselik a’k zokke fouten maeke, dat ik hebbe netuurlik niet meer slaopen. Now mos ik toch betied van bedde, want de twie tuunmannen (m+v) kwammen en ze hadden een stageloper bi’j heur. Dat ze hebben hier nog koffiedronken en doe hadden ze de put d’r ok al uut. D’r komt trouwens al een protte blad van de bomen.

We hebben nog een dag of wat biesterbaorlik mooi zoemerweer en daor moe’n we van profiteren. Ik hope vanzels dawwe in september en begin oktober nog een heerlik ooldewievezoemertien kriegen, mar we kun ok zo in een halfjaor haast mit een protte natte belanen. Daor zuwwe dan rap et nocht of hebben. Ik hebbe vandemiddag nog een klein fietstochien maekt. Et wodde 25 graoden, mar d’r ston ok een best stok wiend. Ik bin bi’j de Kuunder langes naor Berkoop reden en doe over De Hoeve weer naor huus. Ik bin over et mooie Meuleboersterpad kommen. Halverwege ligt de hoolten brogge over de Noordwooldiger Vaort. D’r wonen gien meensken an dat pad, mar wel drie ponnies en die he’k op petret zet.