Bevroren goud

We hebben vleden weke in oons husien in Ditzum niet naor de tillevisie keken. We hebben wel perbeerd om de Nederlaanse zenders te vienen, mar dat is oons niet lokt. In wezen wussen we een dag of wat niet wat d’r in de wereld te redden was. We hebben oons liekewel gien tel verveeld. We hebben vanzels altied boeken bi’j oons en zatten aovens dus heerlik te lezen. Ik hebbe Bevroren goud daor uutlezen en ik bin begonnen mit Souvenirs van Ferry Zandvliet. Bevroren goud is een literaire thriller van Cilla & Rolf Börjlind. Ik hadde al eerder boeken van dit bekende schrieversduo lezen. As in dit boek an et aende van een lange zoemer de sni’j smult in de bargen van Noord-Zweden, wodt et lichem van een man vunnen die daor omtrent twintig jaor eerder doodscheuten wodde. De jonge rechercheur Olivia Rönning reist d’r henne om et spul te onderzuken. Onderwegens naor dat plak komt de helikopter in een sni’jstorm terechte en verongelokt. De piloot is zwaorgewond. Olivia perbeert in de bewoonde wereld te kommen. Dat lokt en op et laeste wodt de moord ok oplost. Mar dat gaot allemaole niet zomar. Een mooi en spannend boek!