Bevri’jdingsdag

Gistermorgen he’k op ‘e fiets naor pedicure Linda in Noordwoolde west. Ze zit daor pal naost de dieredokter daor a’k ien keer in et jaor mit poes Marja naor toe gao. In et vervolg za’k om de zes of zeuven weken naor heur toe. Et woord pedicure is vanzels gien Stellingwarfs woord. Et staot dan ok niet in et Stellingwarfs Woordeboek. Kuwwe gien ni’j Stellingwarfs woord veur een pedicure verzinnen? In et Stellingwarfs Woordeboek staot et woord behemmelen wel. Dat het meerdere betekenissen. Et betekent ok de voetbehandeling bij vee. Zo staot et in et Woordeboek. En dan veural bi’j koenen en peerden. Dan kan dat veur meensken toch ok? Wat donkt jim van een voetebehemmelster? Ik et vervolg gao ik daor dus henne en niet meer naor een pedicure. Of weten jim een nog mooier en beter woord?

Kregen of kochte dichtbundels laot ik vaeke lange naost de stoel liggen. Soms lees ik d’r nog es wat in omme naoda’k ze hielemaole lezen hebbe. Soms ok niet. Now gaon d’r twieje naor de boekekaaste in mien warkkaemer. Et bin Fier dyn eigen taal mit 222 gedichten in kleine taelen en et deur Tsead Bruinja saemenstelde boek De eerste bloemlezing van de Nederlandse poëzie 101 gedichten uit het Koninkrijk van 1945 tot nu. In et eerste boek staot mien gedicht Naachtboot en in et twiede boek mien gedicht Mien oolde huus.

Et is vandaege Bevri’jdingsdag. Zoas ieder jaor kiek ik vanaovend naor et Bevri’jdingskonsert op ‘e Amstel. Hieronder een mooie oolde prente die me toestuurd wodde deur Jan Peereboom van De Jouwer, mar van vroeger van De Blesse.