Bevri’jdingsdag

Et was gisteraovend een mooie plechtighied in Wolvege. D’r was een protte volk op ofkommen. Behalven et Wilhelmus en et God save the King wodden ok de volkslieden van Kannede (O Canada) en Australië (Advance Australia Fair) speuld deur de muzikaanten van De Harmonie.

Ik hebbe vandaege et speciaole nommer van De Twiegsnieder naor anleiding van 80 jaor vri’jhied lezen. De Twiegsnieder wodt uutgeven deur de DAN. Et dörpsarchief Noordwoolde. Harry en Frans brochten me gister, onderweg naor heur huus op Texel, een exemplaor. D’r staon allemaole verhaelen in over Noordwooldigers en hoe die de oorlog al of niet overleefd hebben. Om goed te beweren!

Vandaege he’k een foto maekt van et Verzetsmonement in Wolvege. Zie hieronder. De Utrechtse beeldhouwer Jan van Luyn kreeg de opdracht in 1947 om een beeld te maeken. Et wodde onthuld op 3 meie 1952 in de tuun van Huze Lindenoord. Et symboliseert de ienhied tussen man en vrouw in de oorlogsjaoren. In de sokkel staot: Man en vrouw – in bange tijd – een in lijden – een in strijd – 1940-1945. Et beeld is now verplaetst van Huze Lindenoord naor et gemientehuus in Wolvege. Et staot daor mooi. Vleden weke wodde de sokkel besmeurd mit rooie varve. Wie dot of doen zoks toch…

Vanaovend gao ‘k zoas gebrukelik kieken naor et Bevri’jdingsdagkonsert op ‘e Amstel in Amsterdam.