Beurt

Vandemorgen bin ‘k naor de gerage west en daor het de auto nao twie jaor de eerste grote beurt had. Ik hebbe daor een fiets mitkregen en bin zolange naor Haarm en Jacob gaon. Daor he’k wat drinken had en we hebben even genoeglik bi’jpraot. Dat moet zo now en dan. Vandemiddag he’k overleg had mit de internist. Eerder gong ik dan altied naor et ziekenhuus om een schoffien mit zoe’n man te praoten. Vandaege-de-dag gebeurt dat tillefonisch. Ik zal in oktober weer een inwendig onderzuuk hebben moeten. Dat duurt dus gelokkig nog even…

Veur de liefhebbers… Ankem weke deensdagaovend hoolt Arjan Sterken, de direkteur van de Stellingwarver Schrieversronte, een lezing over volksverhaelen in de biebeltheek in Wolvege. Et is van half achte tot omtrent kwat veur negen. De toegang is vergees!