Betied op ‘e fiets

Ik hebbe vandaege een heerlike fietstocht van 48 kilemeter maekt. Ik bin wel aanderhalf ure eerder votgaon as aanders in verbaand mit de hitte die kommen zol. Et is hier op et ogenblik om half zeuven 31 graoden. Mar ik was vandemiddag om half twieje al weer thuus. Ik bin bi’j de Lende langes naor de Driewegsluus reden en daor he’k op een baankien wat waeter dronken en een melkbrotien oppeuzeld. Ik hadde twie flessen waeter bi’j me. Ik bin over de Scheenesluus en deur de Braandemeer fietst en doe op Wolvege an. Om twaelf ure bin ‘k daelestreken op et terras van De Stoof. Daor he’k een lekker koppien gruuntesoep en een tosti had. Ik vun daor een munt van twintig centen op et terras. A’k trouwens blikkies in de baarm liggen zie daor staosiegeld op zit, neem ik die ok mit. Ik wete daj’ op die meniere niet gauw een vekaansiehuus op Ibiza bi’j mekeer hebben, mar et is wel een begin. In bin over Der Izzerd naor huus fietst, onder de bomen deur dus. Hieronder nog een foto die ‘k onderwegens maekt hebbe van de Schipsloot in Ni’jlaemer. Ik stappe morgenvroeg weer betied op ‘e fiets!