Bestemming Reykjavik

Ik hebbe de Ieslaanse roman Bestemming Reykjavik van Gerard van Klaveren lezen. Gerard is sund 2003 Honorair Consul van Ieslaand en hi’j was van 2005 tot 2017 burgemeester van West-Stellingwarf. Ik kenne him dus en allienig daoromme was et al aorig om dit boek te lezen. De roman gaot over Eric Noordeweg, een ondernemer uut Rotterdam en eigener van een vrieshuus in de haven van Reykjavik. Et verhael speult tiedens de baankekrisis in 2008 as et mit Ieslaand hielemaole mis liekt te gaon. Eric gaot naor Ieslaand en perbeert om de muuilikheden mit zien baank op te lossen. Hi’j komt daor in de kunde mit de Ieslaanse Lilja, daor hi’j gedoente mit krigt. Deur heur kontakten krigt hi’j toegang tot belangrieke politici en de top van de Ieslaanse baanken. Lokt et Eric om zien femiliebedrief overaende te holen? Dat is de vraoge! Et is een mooi boek en ik hebbe et een weke of wat leden in iene goeze uutlezen.