Beste bluster

We hebben vandaege een mooie boottocht maekt van goed acht uren. Et was heerlik weer, de temperetuur leup op naor 25 graoden. Mar d’r ston wel een beste bluster. Wiendkracht 5. Dat was op et waeter te marken. We bin over de Swette naor Scharnegoutum veerd. Ik wete dat d’r dagboeklezers binnen die daor een dochter en schoonzeune wonen hebben en op die heur katten ze wel es passen. We bin doe deur Sneek veerd. Daor was et drok, et is daor Sneekweke. Tot veer in de naacht zal daor wel een flut volk op ‘e diek ommedangelen. We bin mit de hadde wiend over et Sneekermeer veerd en doe over et Preenses Margrietkenaol richting Terhorne, Ooldeschouw, Grou en vervolgens tussen Wartena en Eernewoolde deur naor Suawoolde. We hadden weer broties en drinken mit an boord. Een mooie dag. Ik hadde ok mooie foto’s maekt, mar die kan ‘k niet zien laoten. Et foto’s versturen vanof de tillefoon wil niet meer. Ik moet me argens anmelden. Ik hebbe gien flauw benul wa’k doen moet. Dan mar even zonder foto’s.