Bertha

Vandemiddag he’k op ‘e fiets naor kapster Bertha in Et Vene west. Ik bin deur de Mildamster Poolder fietst en over et fietspad bi’j de Kuunder langes. Van mien huus naor heur huus is percies 17 kilemeter. Jim bin misschien rap weer bi’j de kapper weg, ik bin d’r altied ongeveer twienenhalf ure mit onder de pannen. Eerst he’k een bakkien thee (van et Kissien van de Keizer) had mit een plakkien koeke mit botter. Vervolgens is ze mit me an de gang gaon: haorwasken, heufdhuud masseren, knippen, scheren, oppolletoeren. Zoks duurt minstens een ure. Daornao hewwe tegere wat eten: een lekkere kop sop en een uutsmieter. En doe nog weer een bakkien thee. Deur Oranjewoold bin ‘k weeromme naor huus fietst. Ik hebbe daor et prachtige Oranjestein op petret zet. De aodellike femilie De Beaufort het et laandgoed krek verkocht. D’r wo’n gelokkig gien malle dingen mit daon. Et blift prachtig in oolde staot beweerd.