Bertha

Gister en vandemorgen he’k doende west mit et schrieven van een verhael veur et Stellingwarver tiedschrift De Ovend. An de haand van foto’s uut mien archief schrief ik daor de laeste peer jaor verhaelen bi’j. Dit verhael hiet Vertellen is mooier as schrieven. Ik moet et nog wel een keermennig naokieken en iederkeer weer veraanderings en verbeterings anbrengen veurdat et me naor de zin is.

Ik bin vandemiddag naor kapster Bertha in Et Vene west. We bin begonnen mit een koppien thee mit hunning en een stokkien koeke mit botter. Doe het ze een ure wark had om me weer jong en enerverend te maeken. Vervolgens hewwe een koppien snet had, een beschuut mit geitekeze en nog een koppien thee. Ik kreeg ok nog wat knieperties en rollegies van heur mit. As Drentse bakt ze die vanzels zels. Vandaege over zes weken, op 23 december, za’k weer naor heur toe.

In de hal ligt wat geld en een poedegien mit slikkeri’je klaor. Vanaovend kommen de kiender mit lampions bi’j de deuren langes. Et is 11 november en dus Sunte Matten. Et is spietig dat ze niet meer in et Stellingwarfs zingen zoas wi’j vroeger deden. Sunte Sunte Matten, Sunt Matten op een stokkien… Et is mooi dat dit oolde kienderfeest nog altied bestaot!