Bertha

Harry en ik hebben gistermiddag mit groot genoegen de tentoonstelling Herman Gordijn grafiek bekeken in et Centrum veur Prentkeunst op ‘e Fochtel. Slim de muuite weerd! Gao daor dus mar henne! Et tot now an toe onbekende petret van Beatrix is daor ok te zien. We hebben daor ok een bakkien thee dronken mit de vri’jwilligers die d’r an de slag weren. Gisteraovend he’k bi’j Harry en Frans in Noordwoolde eten had. Zoas beloofd: een lekkere ovendschottel mit zoerkool, rul gehak en rezienen. En veur oons ieder een dadde pat van een gelderse wost. Butendat hewwe slimme genoeglik bi’jpraot. Om kwat veur negen bin ‘k deur de regen weer naor huus gaon daor poes Marja lekker op ‘e baank in de kaemer lag.

Naoda’k vandemorgen in Wolvege wat bosschoppen daon hadde, wa’k om twaelf ure bi’j kapster Bertha in Et Vene. We hebben eerst tegere eten: een lekker koppien sop mit al lieke lekker Turks brood mit geitekeze. Nao et eten het Bertha me et haor wusken, de heufdhuud masseerd, et haor bekubbed. Mit wat kleurversteviger d’r deur liek ik now wel twintig jaor jonger. Nao de knipperi’je he’k nog twie koppies thee mit hunning bi’j heur had mit een stokkien koeke mit botter en een stokkien spekelaos mit een vulling van marsepein. Ik kreeg ok nog een biologische grune kool en een spitskool van heur mit. Die he’k thuus in stokkies sneden en in de vriezer drokt. Laot de winter now mar kommen! Ik hebbe eten zat in huus!