Bergveldpries

Gisteraovend he’k weer geneuten van de thriller Unfaithful uut 2002 mit Richard Gere en Diane Lane. Ik hadde him wel eerder zien, mar ik wus niet percies meer hoe et ofleup, dat ik hebbe tot elf ure in spanning zeten. Een prachtige film! Krek as Philadelphia uut 1993 mit een nog jonge Tom Hanks en Denzel Washington. Die film he’k een peer weken leden nog es weer zien en d’r ok weer slim van geneuten. Een prachtig rechtbaank-drama uut de aids-tied in Amerike.  

Vandemiddag kwammen Harry en Frans even langes mit een bos tulpen en et boekewekegeschink Gezinsverpakking van de Chabotten. De boekeweke is weer begonnen. Koop dus allemaole een boek, want van boeken en lezen kriej’ nooit genoeg!

Harmen Houtman krigt dit jaor de H.J. Bergveldpries veur zien meer as 50-jaorige vrotteri’je in en veur et Stellingwarfs. Dat is mooi! De jury beston uut Ingeborg Nienhuis, Pieter Jonker en Peter Hiemstra. De pries wodt uutreikt op 25 meert, aovens in de mooie karke van Berkoop. Nao de uutreiking is d’r een pergramme om de Winterreise van Schubert henne mit et Nijkoor onder leiding van Klaas Peter van der Laan,  solisten en verhaelevertellers. De Bergveldpries wodt veur de negende keer uutreikt. Eerst was de pries twiejaorliks, laeter is et een zesjaorlikse pries wodden. De eerdere winners weren: Hendrik Vondeling (1982), Johan Veenstra (1984 en 1991), Pieter Jonker (1986), Fokke Middendorp (1996), Henk Bloemhoff (2003), de Stichting Stellingwarver Schrieversronte (2009) en Ruurd Jelle van der Leij en Freddie de Vries (2016). De pries is nuumd naor de schriever H.J. Bergveld (1902-1966).