Belastingkladdeboel

Ik hebbe vandaege mit de jaorlikse belastingkladdeboel veur mezels en mien stichting an de gang west. Vroeger vulde ik de angifte mit de penne in. Dat mag trouwens nog altied wel. Mar doe dat komputergedoe begon ha’k et nao ien keer wel bekeken en bin ‘k naor Administraosiekantoor Veenstra (gien femilie) in Wolvege gaon. Joop dot et now veur mi’j. Mar ik doe zels wel alle veurwark en dat is best nog een protte wark, want ik hebbe een uutgebreidde angifte mit een protte kleine inkomsten en ok een protte onkosteposten. Butendat nog een boel giften. En al et optelwark en zo doe ik dus zels. Ik bin d’r now klaor mit.

Nao et eten he’k vandemiddag een kleine kuier maekt en ik hebbe onderstaonde foto maekt. Disse huzen staon in Ni’jhooltpae tegen de Weembos an. Ik hebbe de foto neumen vanof et Evenementeterrein. Een peer weken leden is d’r in oons mfc een plan prissenteerd om op dit terrein dattien huzen te bouwen. Veerderop in et dörp, naor Hooltpae op, veur de theetuun, is ok een plan veur et bouwen van huzen. Hopelik blieven et gien plannen, mar komt d’r ok wat van op ‘e hispel. Et dörp zit te springen om statterswonings.