Bed & Breakfast

Ik kieke altied naor et tillevisiepergramme Bed & Breakfast en doe zag ik Ella en heur man gisteraovend inienend. Ik ston op et aende van november nog bi’j Ella in De Geele Bosch in Hooltwoolde op ‘e Wintermark van Mildam. En now blieken zi’j en heur man daor vlakbi’j in een boerderi’je een B&B te hebben. Wat aorig om te zien. Et weren gisteraovend allegeer B&B’s in Frieslaand en ien van de uutstappies gong naor et kesteel van Gerrie Halman in Blesdieke. Dat was ok mooi om te zien. Gerrie oftewel kesteelheer Gregorius zag d’r prachtig uut en praotte zoas altied gewoon Stellingwarfs. Dit was de twiede keer da’k B&B-eigeners kende in dat pergramme. De B&B De laeste stuver bi’j de Scheenesluus zat jaoren leden ok in dat tillevisiepergramme.

Ik kan haost wel een kaemer in et ziekenhuus nemen. Ik moet d’r nog weer henne veur de staaropperaosies op 3 meie en now bin d’r vandaege twie ofspraoken maekt, op 21 en 27 juni, veurofgaonde an een daarmonderzuuk. Wanneer dat is wee’k nog niet.

Ik bin gek op statistieken. Zundag is mien elektrische fiets zes jaor wodden. Ik hebbe d’r now mit mekeer 12033 kilemeter op fietst. Over die zes jaor verdield: 2284, 1795, 2417, 1908, 1780 en 1849 kilemeter.