B&B Buiten

Op 30 juni was René Koster van Omroep Frieslaand hier om me te interviewen over mien leven. Dat interview was op 13 augustus te beluusteren en daor kwammen een protte reakties op. Op een gegeven ogenblik ston ik mit René op ‘e weg veur mien oolde huus, dat een tippe van de weg of ligt. Ik vertelde doe dat d’r now een B&B bi’j is en dat ik van plan was en gao daor nog es een keer henne. Misschien wel wat gek, want et is mar 500 meter van mien tegenwoordige huus of. Mar toch, ik zol et hiel graeg willen. Et is een groot verlangst. Dat was dus op ‘e radio te heuren. Vleden weke vun ik een kaortien in de busse van Ronald en Gré die now in mien oolde huus wonen en die B&B beheren. Ze neudigden mi’j twie daegen en naachten uut om daor uutvanhuus te kommen. Dat is toch wel een allemachtige mooie reaktie! Daor ha’k dus nooit op rekend. Mar ik zal now zaoterdag dus naor mien oolde stee. Nao al die jaoren slaop ik daor weer tussen dezelde grote iekenbomen en he’k etzelde uutzicht weer as vroeger. In augustus 1966 he’k daor veur et laeste in mien oolde huus slaopen, now slaop ik in een prachtig gebouwgien dat de naeme Buiten het. Zie de foto hieronder. En van binnen zicht et d’r ok prachtig uut. Kiek mar es op https://www.bedandbreakfast.nl/nl/a/75880/buiten Ik hope dat et zo te vienen is… Ik gao daor de kommende zaoterdag in ieder geval mit groot genoegen henne!