Bakken

Vandemorgen he’k een taart bakt. In wezen he’k twie keer een ronde keek bakt en die he’k op mekeer legd mit abrikozesjem d’r tussen. Ik hadde et nooit eerder daon, mar et is goed lokt. Omdat et zo drok is mit alderhaande opdrachten/projekten he’k tegenwoordig gien tied en kook elke dag. Ik maeke zo now en dan een flut stamppot of makkeroni veur een dag of drieje klaor. Vandemorgen he’k nao et taartbakken een grote panne mit makkeroni maekt. Now kan ‘k wel weer even veuruut. Nao et eten he’k een aende lopen. Ik moet wat beweging hebben. Eerst deur de Weembos naost huus en doe bi’j de Scheene langes naor de Koebos. Hieronder een foto van de oostelike laene van de Koebos. Daor kwam ik de overburen tegen. We hebben daor genoeglik even praot. Over de hadde weg bin ‘k weer naor huus lopen. Ik bin zodoende niet an vule schriefwark toe kommen. Ik hebbe wel et slot van et wat langere verhael Silverboy veraanderd. De mini-leeskemmissie vun dat slot wat onbegriepelik mit vier regels uut een Engelstaelig lietien. Ik hebbe d’r now bi’jzet dat et regels uut Bridge over troubled water van Simon & Garfunkel binnen en now is et hopelik een stok dudeliker veur de meensken die et misschien ooit lezen zullen.