Bakken

Ik bin een fan van et tillevisiepergramme Heel Holland Bakt. Dat is now dus weer genieten op ‘e zaoterdagaovend. Et is mooi om te zien hoe as opdrachten geweldig goed lokken en… mislokken. En et inspireert vanzels ok. Nao gisteraovend he’k vandaege aachterienvolgens een heerlike kruudkoeke mit gember, sukade en rezienen bakt en votdaolik ok nog elf Portugesies d’r aachteran. Die bin al lieke lekker wodden. Gaasten die hier over de heerd kommen, priezen mi’j in de regel om mien bakkeunst. As André van Duin mien koeken en koekies pruven zol, zol die et ok lekker vienen. Daor bin ‘k wel haost wisse van. Mar Robert en Janny zo’k de boel niet pruven laoten. Die kun zo zunig kieken en dan beginnen ze te praoten over ietsien meer van dit en dat. Dan zollen mien illusies da’k een geweldig goeie koekebakker bin zomar uut mekaander spatteren kunnen. En dat moet vanzels niet.

Vandemiddag was et eerst nog prachtig zunnig weer, dat ik bin op ‘e fiets naor de supermark in Wolvege west. De wiend was nog wel wat koold, mar de kommende daegen wodt et fantastisch mooi veurjaorsweer! Dat is oons temeensen beloofd… Ik zag bi’j et gemientehuus in Wolvege en bi’j een woonhuus in Tuundörp de vlagge van Oekraïne wapperen. Iederiene die ok mar een betien verstaand in de kop het, walgt vanzels van die smerige poedzak(ken) in et Kremlin.