Autowasken

Jarmo het vandemiddag mit mi’j en mien auto deur de wasstraote west en hi’j het de auto van binnen hielemaole schonemaekt. Dat gebeurt ien keer in de twie maonden. Zo hewwe dat ofpraot. Ik vun dat de auto nog niet echt smerig was, hi’j vun van wel. Alle vervelende wark bestede ik zo staorigan uut. Ik laote een aander et wark doen en stao d’r dan zels as een opzichter bi’j. Die rolle ligt me wel. Op ‘e foto hieronder is Jarmo drok doende. Wat niet zo mooi is… Hi’j zag drekt een peer krassies op ‘e ni’je auto. Ik hadde die nooit zien en ik wete ok beslist niet hoe as die d’r op kommen binnen. Bin ik bi’j takkeboel langesreden? Ik wete et gewoon niet. In wezen zit zoks mi’j niet in de wege, mar Jarmo vint dat doodzunde en vint da’k dat opknappen laoten moet. Ik zal d’r es over naodaenken. Dat is weer zoe’n gedoe. Hi’j het bi’j me thuus ok bi’j de veurdeure keken. Die kon ik mit de sleutel niet meer loskriegen. Hi’j zal d’r morgenaovend bi’j veur-, aachter-, en geragedeure ni’je cilinders inzetten. En dan krie’k ok ni’je sleutels. Misschien dat d’r een hiel ni’j slot in de veurdeure moet, mar daor wet hi’j ok wel iene veur die dat doen kan. As ik die man niet hadde, vertiesde ik allienig overal in.