Autowasken

De laeste keer dat mien auto wusken wodde, was op 12 jannewaori. Jarmo vun dat zoks neudig es weer gebeuren mos, want de auto was gewoon hatstikke smerig. Ik zie zoks niet zo. Et is mi’j wel goed as de auto smerig is. Et is mar een ding dat me van A naor B brengt. Mar vandemorgen bin ‘k dan toch mar naor et onderkommen van et zo staorigan beroemde Computerservice Hofma in Wolvege reden. Daor weren Jarmo zien vader en moeder ok. Ze hebben daor een hiel fluttien lillike enten en die kun huurd wodden. En vandaege kwam d’r dus een koppeltien volk dat in drie lillike enten de diek uutzet is. Jarmo is in mien auto stapt en het die deur de wasstraote reden en doe is de auto in een appat gebouwgien dreugd. Et is een groot verschil, ik geve et drekt toe. Vervolgens biwwe naor et resteraantien De Stoof gaon en daor hewwe lekker wat eten. Ik hebbe een heerlik twaelfuurtien had en hi’j een grote uutsmieter. Doe ‘k weer op huus an zol en de auto aachteruut ree, raosde Jarmo inienend: ‘Pas op, een paoltien!’ Netuurlik wus ik wel dat daor gien paoltien ston en ik kon ok op ‘e kamera zien dat daor in de veerste veerte gien paoltien te bekennen was. Mar ik schrok me vanzels dood. Dat bin zien grappies… Mit et volwassen wodden zol zoks overgaon moeten, mar in dit geval betwiefel ik dat in hoge maote.

Et is nog altied prachtig zunneschienweer, mar mi’j toch wat te fris om een aende fietsen te gaon. Ik bin een mooi en ok waarm weer fietser. Ik kan trouwens weer foto’s vanof mien tillefoon naor mien mailadres sturen. Hieronder dan nog de foto die ‘k vleden donderdag, doe et heerlik waarm fietsweer was, maekt hebbe op et broggien in Kaelenbarg. Altied awwe deur Kaelenbarg kommen, maek ik een foto vanof dit broggien. We kieken hier in de richting van Ossenziel.