Auto weer thuus

Gisteraovend he’k de auto weer thuus haeld. Hi’j het meer as twie weken op ‘e oprit van Jarina an de Karkedreef staon. Et kleine stokkien weg is now opni’j bestraot en klaor. Et is mooi wodden. D’r stonnen gisteraovend nog wel hekken over de helte van de weg, mar daor koj’ al weer bi’jlanges rieden. Die hekken stonnen d’r vandemorgen nog. De kraantebezorger kon d’r dus ok best wel bi’jlanges, mar ik hebbe gien kraante kregen. Now is alle hekkeboel vot. Zollen we hier now morgen eindelik de kraante wel weer kriegen? Ik moet et eerst nog zien. Et is me een ellende. Elke dag stuur ik een berichien da’k de kraante(n) niet kregen hebbe en dan krieg ik een berichien weeromme dat ze de melding kregen hebben. En veerder heur ie d’r hielemaole niks van.

Ik bin vandemiddag even op ‘e fiets naor Wolvege west en mit de fietstassen vol bosschoppen weer thuuskommen. In Wolvege stak een vrouw de haand tegen me op, een man zee vrundelik van goeie en ik hebbe een schoffien mit een vrouw praot, die me kende. En ik… hadde gien idee wie et allemaole weren. Ik vien dat toch zo vervelend. Ik hebbe vandaege ok nog een kollum in klad schreven. Ik warke et stokkien laeter wel uut. Et gaot over populisten daor zoe’n flut meensken aachteran vliegen. Mar aj’ dat volk now es in heur ondergoed zaggen, vlak veurdat ze op bedde zullen, mit protserige peinzen, bonkige bienen en kwabberige kinnen… Zollen ze dan nog zovule stemmen kriegen?