Auto weer as ni’j

Vandemorgen kwam Jarmo hier. Hi’j mos wat instellen op ‘e komputer en dat was in een menuut gebeurd. Doe het hi’j hier de rookmelders even konterleerd. Een schoffien leden scheut ik naachs wakker omdat dat ding in mien slaopkaemer inienend lewaai begon te maeken. Ik hebbe him doe uutzet. Jarmo het ze allemaole even bi’jlanges west en me de opdracht geven om zoks elke veertien daegen een keer te doen. Dat zal ik vanzels doen. Omdat de auto de laeste daegen angaf dat d’r wat mit de locht in de banen was, het hi’j daor ok even naor keken. Now hoef ik morgen niet naor de gerage. Hi’j is in mien auto stapt, ik bin naost him zitten gaon, en doe biwwe naor een tankstesjon in Wolvege reden. Daor het hi’j d’r veur zorgd dat d’r in elke baand lieke vule locht zit. Doe hi’j geweerwodde da’k in et vorrels jaor da’k de ni’je auto now hebbe him nog nooit wusken hebbe of wusken laoten hebbe, vun hi’j dat zoks beslist niet kon. Zoe’n mooie, ni’je auto heurde d’r netties uutzien te blieven. Mar ja, ik hechte niet zo an die dingen. Zonder veerder mit me te overleggen ree hi’j votdaolik naor Frans Autoglans en daor het de auto een beurt had zoas nog nooit een auto van mi’j een beurt had het. En dat was nog niet genoeg. Ok zonder overleg biwwe naor zien bedriefsadres reden en daor het hi’j de auto van binnen ok een beurt geven. Ik vun dat et d’r van binnen best wel netties uutzag, mar vermoedelik vint hi’j mi’j een smeertonte. De banen bin zels mit een spray bewarkt zodat ze now mooier lieken. Mien hemel nog an toe, et moet toch niet gekker. En in de auto is zovule bedwelmende locht van appels spuit da’k die nog wel twie weken roeken blieven zal. Ik hebbe mitien de bosschop kregen dat dit in et vervolg op elke eerste zundagmorgen van de maond gebeuren zal. Dat daor kan ‘k now mar rekening mit holen. Vervolgens hewwe heerlik luncht op et terras van De Stoof. Weer thuus he’k een foto van mien auto maekt. Hi’j glaanst as kwam hi’j krek uut de showroom en de locht van appels wienselt om me henne a’k d’r instappe.