Auto

Ik hebbe de laeste daegen verhaelen rippeteerd veur de optredens van morgenaovend in Kootstertille en zundagmorgen in Dwingel. Butendat he’k twie kollums schreven: Ereburger en Erewaacht. Vandemiddag he’k mien jaorlikse griepprik had in sporthal De Steense in Wolvege. Et was d’r een drokte van belang. Eregister kree’k de uutneudiging veur een coronaprik. Ik zal ien disser daegen een ofspraoke maeken. Ik zal d’r now wel wat veerder veur reizen moeten, want niet alle inentingsplakken bin nog in bedrief. De veurige coronaprikken kree’k in Et Vene en Drachten. Et liekt me hiel verstaandig en neem disse prikken. Vandaege is mien auto trouwens jaorig en hi’j is acht jaor wodden. Vroeger kocht ik elke vier jaor een ni’jen iene. Mar doe corona begon ha’k daor even gien nocht an. Misschien ankem jaor nog ien keer? Ik kan marken dat de coronapandemie over is, want ik hebbe et laeste jaor weer meer kilemeters reden as de drie jaoren d’r veur. Doe ‘k vroeger nog hiel vaeke vot gong te vertellen ree ik zoe’n 21.000 kilemeter in et jaor. Dat is slim inkot deur de jaoren henne. Hier dan et tal kilemeters da’k in de laeste acht jaor reden hebbe: 14.436, 13.551, 13.875, 12.178, 8.054, 7.702, 7.760, 9.253.