Auto

Gistermiddag he’k even wat brummels plokt en zodoende deur onslicht laand ommebeinseld. Doe ‘k thuuskwam wa’k zo poesterig as een dempe kedde. En dat veur aanderhalf pottien sjem. Ik sutele ankem weke niet mit, mar ik wil et daornao eins toch mar weer perberen.

Vandemorgen he’k de auto naor de gerage in Et Vene brocht veur een grote beurt, de apk-keuring en d’r mos ok en ni’je akku in. Ie schrikken je wild van de nota die je dan laeter prissenteerd wodt. Ik hebbe een fiets van de gerage mitkregen en doe bin ‘k naor kapster Bertha gaon. We bin begonnen mit een koppien thee mit hunning en een beschuut mit erebeien, doe het ze me et haor wusken en knipt en zo. Vervolgens he’k een kop heerlike sop had, een uutsmieter en doe nog een koppien thee mit een wit boltien mit sjem. Doe wa’k ok wel toekocht, mar et was heerlik. En doe bin ‘k dus weer op ‘e fiets naor de gerage peddeld, he’k die nota betaeld en de auto weer mitneumen. Ik was nog mar even thuus doe oold-kollega Jan op ‘e fiets langeskwam. We hebben genoeglik even bi’jpraot en et vanzels ok over oonze mankementen had.

D’r kwam een kaorte over de post van Janke en Jelke uut Berkoop vanuut heur vekaansieadres in et Fraanse Normandië. Hiel mooi! Wí’j hopen dat et goed mit je gaot, staot aachter op ‘e kaorte.