Johan Veenstra
Stellingwarver schriever en verteller
Plaetst op 19 oktober 2022.
Ien van mien faveriete tillevisiepergrammes is BinnensteBuiten mit veurnaemelik rippertages over mooie huzen, tunen en lekker eten toemaeken. Et is aovens tussen zeuven en achte op NPO 2. Twie daegen aachter mekeer kwammen de Stellingwarven an bod. Eerst een mooie film over voegels in et Fochtelder Vene en gisteraovend een petret over de bewoners van de oolde schoele en et meestershuus in Blesdieke. Zoks maekt et vanzels extra aorig!
Mien auto is vandaege zeuven jaor oold wodden. Vroeger kocht ik om de vier jaor een ni’je auto, mar vroeger is veurgoed veurbi’j. Doe ‘k nog hiel vaeke et pad uutgong om argens te vertellen, ree ik zoe’n 22.000 kilemeter in et jaor en in et laeste jaor nog mar 7.760 kilemeter. Dat was trouwens 58 kilemeter meer as in et jaor d’r veur. Omda’k gek op statistieken bin hier dan et tal verreden kilemeters in de laeste zeuven jaor: 14.436, 13.551, 13.875, 12.178, 8.054, 7.702 en 7.760.