Asing

De kiepe daor ik gister over schreef, bleek een haene te wezen. Hi’j ston vandemorgen luud kri’jende op ‘e oprit. Ik vien dat een prachtig geluud, et heurt bi’j et plattelaand. Ik wete nog niet waor as hi’j thuusheurt, mar hi’j mag hier mit alle genoegen van et voegelvoer miteten. Nog een kostganger d’r bi’j is gien inkeld perbleem.

Om vier ure wa’k vandemiddag bi’j Pieter Poot op ‘e Blesse. Wie de Liwwadder Kraante lest kan et niet ontgaon wezen dat Asing Walthaus mit pensioen gaon is. Hi’j was journalist, jaorenlaank heufd van de kultuurredaktie van de Liwwadder, en kollumnist.Van 2010 t/m 2023 schreef hi’j honderden kollums in de kraante. D’r bin now honderd van uutkommen in een boek. Asing columns staot op et omslag. Et boek is uutgeven deur uutgeveri’je Wijdemeer in Dokkum. Asing reist now de hiele perveensie deur om zien boek overal te prissenteren. Zodoende was hi’j vandemiddag op ‘e Blesse. Morgenmiddag is hi’j om vier ure in kefé Marktzicht in Drachten. Hi’j vertelde eerst over himzels en zien wark en las doe vier kollums veur. Vervolgens konnen we et boek vanzels anschaffen en dat he’k mit groot genoegen daon. Asing schreef veur in mien boek: Voor Johan Veenstra. Voor het eerst dat ik een boek aan een schrijver verkocht.Veel leesplezier, Asing Walthaus. Uutgever Louw Dijkstra van Wijdemeer, die ik nog kenne van de tied dat hi’j bi’j Bornmeer warkte, het oons tegere op petret zet.