Asing

Et was vandaege ok al weer et mooiste weer van de wereld veur Eupen Stal, dat et was weer drok in Berkoop. Et was ok de beste verkoopmiddag tot now an toe. Verschillende meensken vertelden me dat Asing Walthaus over me schreven hadde in de Liwwadder Kraante. Dat hadde ik vanzels ok al zien en lezen. Walthaus was indertied de grote man van de kultuurredaktie en schrift now nog kollums veur de kraante. Vandaege veur een weke kwam hi’j langes en kocht een twiedehaans exemplaor van Een brogge van glas van me. Ik hadde daor een hiel fluttien nette twiedehaans boeken van me liggen. Op iene nao bin die allemaole al verkocht. Asing schreef dat hi’j in Berkoop zo weinig Stellingwarfs heurde. Ik heure ok vule meer Nederlaans en Fries. De bezukers van Eupen Stal kommen echt overal weg. Ik zal naor anleiding van de kollum van Asing ok nog een kollum schrieven. Zo holen we mekeer doende. Et was mooi dat Gerda vandemiddag langeskwam. Ik hadde even niet in de gaten dat zi’j et was. Gerda van der Veen zat in et aldereerste bestuur van de Stellingwarver Schrieversronte. Ze woonde in Appelsche, vlakbi’j et waeterpompstesjon. We hebben et now over et begin van de zeuventiger jaoren van de veurige ieuw. Ze was d’r vandemiddag mit heur man en goeie kunde uut Grunningen. Mooi dawwe even praot hebben. Et is trouwens weer een fesien om daor middags te wezen. Hieronder nog een foto. Doe ‘k vandemorgen in de hal ston en naor boven keek, zag ik da’k beloerd wodde deur iene die op ‘e overloop lag.