Asing

Op 2 jannewaori wa’k d’r bi’j doe Asing Walthaus zien boek mit kollums prissenteerde bi’j Pieter Poot op ‘e Blesse. Ik hebbe ze now allemaole lezen en vien et een prachtig boekien. Asing kon mooie kollums schrieven, mar dat wus ik vanzels ok wel, want ik leesde ze altied in de Liwwadder Kraante. Dit is een mooie verzaemeling uut al die jaoren en al die kollums die hi’j schreven het. Stokkies over hiele gewone dingen, de daegelikse dinkies die hi’j mitmaekte. En daor tussendeur as een rooie draod de verhaelties over zien hond Schumi, die hi’j overnam van zien vader doe die wegraekte. Moet d’r ok een boekien mit kollums kommen as ik stoppe mit et schrieven van mien stokkies in de Liwwadder Kraante? Die tied komt vanzels wel dichterbi’j. Dan zollen mien poezen Boris, Joris en Marja as een rooie draod fungeren kunnen. Mar zol d’r nog wel belangstelling veur zoe’n boekien wezen? Ik betwiefele dat ik hoge maote.