As de dag van gister

Et was me gister te waarm om te fietsen. Vandaege was et bewolkt mar wel hiel lekker fietsweer, dat now he’k een tochien van 42 kilemeter maekt. Bi’j de Lende langes naor de Driewegsluus en doe naor Ooldemark. Bi’j et Wiede van de Lende scheut d’r een klein wezeltien veur me et fietspad over. Wat een mooi gezicht! In Ooldemark kwam ik Jan en Alie tegen op et terras van Family. Ik treffe heur vaeke op terrassen. Jan was huusdokter in de Westhoeke. Heur huus in Wolvege staot now te koop en ze verhuzen daor naor een groot appattement. We hebben genoeglik een schoffien praot en ik hebbe intied wat drinken en een twaelfuurtien had. Over Blesdieke en De Blesse bin ‘k naor Wolvege gaon. Daor he’k een peer bosschoppies daon en doe bin ‘k weeromme naor huus gaon.

Op et mement da’k dit schrieve bin ‘k krek weeromme van et karkhof. Et is vanaovend dattig jaor leden dat mien moeder uut de tied raekte. Ik was allienig bi’j heur en laeter zat ik ok liekem allienig bi’j de keukentaofel mit een bastende heufdzeerte de rouwkaorten te schrieven. Ik hebbe d’r vandemorgen een kollum over naor de kraante stuurd. Ik kan al die beelden haorscharp weerommehaelen. Zolange leden al en toch as de dag van gister. Hieronder een foto. Op 16 juni 1978 was mien moeder mit et reisien van de vrouwludeverieninge in Hadderwiek. Ze was doe 69 jaor.