Archief

Ik hebbe vandemorgen een grote hoop brieven en mailties naor de Stellingwarver Schrieversronte in Berkoop brocht. Et bin allemaole reakties van meensken op mien boeken, kollums in de Liwwadder Kraante en dagboekstokkies op mien webstee. Ik hebbe wel es eerder een flut van dat spul naor de Schrieversronte brocht. Et komt daor allegeer in et archief zodat et goed beweerd blift. Bi’j wa’k now hennebrocht hebbe, zatten ok een protte (vaeke hiele ontroerende) reakties op mien autobiografische roman Een brogge van glas. Dat boek het indertied nogal wat tewegebrocht. Ik hebbe mit de direkteur ofpraot da’k binnenkot nog alderhaande spul veur et archief daore brengen zal. Wiels Anke hier vandemiddag et huus schonemaekt het, bin ik (al weer) naor Sneek toe west. Daor he’k bi’j Jelle en Gerda de verjaordag van Gerda nog mitvierd. Ze het vleden weke jaorig west. Ik hebbe daor vanaovend ok een peer broties miteten, zoda’k thuus gien drokte meer mit de eteri’je hadde.