AOW Altied-Onder-Weg

Ik hebbe vandemiddag nog even op ‘e fiets naor Wolvege west om wat bosschoppen te doen. Et is nog altied heerlik fietsweer. Mar ik bin ok begonnen mit et rippeteren van verhaelen. Halverwege september mag ik twie keer argens henne te vertellen. Et is in de buurt, Noordwoolde en Wapservene, en et is middags. Dat is nog wel te doen, daenk ik zo. En a’k niet zolange meer staon kan, gao ‘k d’r bi’j op een taofeltien zitten. Krek zoas Vrouw Hof indertied dee.

Now alleman in de Schatkaemer van Beeld en Geluud in Hilversum ommesnuuien kan, komt d’r mooi spul veur ’t locht. Jan Berend stuurde me de videofilm van de NCRV over Lamkje Hof-de Boer (1908-1992) die indertied vertoond wodde op ‘e tillevisie. De titel was Altijd-Onder-Weg. Wat mooi om dat nog es weer te bekieken. Wat ontroerend om Vrouw Hof deur Berkoop fietsen te zien en heur vertellen te heuren over heur leven. Wat kwammen d’r een boel herinnerings boven. Ze het een protte veur et Stellingwarfs betekent en meer as duzend keer argens henne west om te vertellen over heur leven en… om heur beide boeken Van mien kaant bekeken en Veur loon en verval te verkopen. Van mien kaant bekeken is et best verkochte Stellingwarver boek! Et beleefde drok nao drok. Ik hebbe indertied Veur loon en verval korrigeerd en hadde een protte kontakt mit heur. We bin in 1989 beidend begonnen mit verhaelties te schrieven en te vertellen veur Omroep Frieslaand-radio. Rein Tolsma, de man van de radio, en ik kwammen naor Lamkje heur huus an de Grietmansstraote in Berkoop. Daor wodden die verhaelties opneumen. Nao ien jaor wodde et heur te banig en bin ik d’r nog vuuf jaor allienig mit deurgaon. Niet lange laeter is ze nogal rempend wegraekt. Ik was bi’j de begraffenis en dreug mit bloemen naor et karkhof. Aovens moch ik vertellen uut eigen wark in Giekerk en hebbe doe ok een gedicht van Lamkje veurlezen. De donderdag d’r op gong mien radiovertellegien over heur. In wezen volgde ik heur as verteller op. Ik kon deur de bekendhied die mien radiovertellegies me opleverden ok overal naor toe. En overal waor ik kwam hadden ze et over Vrouw Hof die ok al es bi’j heur west was in heur Daffien. Ik vun et prachtig dat ik eins heur opvolger was om et Stellingwarfs overal heuren te laoten. En ik… hebbe gien opvolger. Al die herinnerings kwammen boven nao et bekieken van die mooie film.

Hieronder een foto die me appt wodde deur Jelle en Gerda. Zi’j bin op et ogenblik op vekaansie in Dornumersiel in et Nedersaksische noorden van Duutslaand. Et aorige is dat Jelle en ik daor ok tegere west hebben. Dat was op 28 en 29 juli 1998. We gongen doe gien midweke vot zoas now, mar twie daegen. Wat is alles zo staorigan toch griezelig lange leden.