Ansichtkaorten

Vandemorgen he’k een verhael ofmaekt veur et Stellingwarfs tiedschrift De Ovend. Et is et tiende verhael veur De Ovend da’k in et laeste halfjaor schreven hebbe. En dat naor anleiding van foto’s uut mien archief. Ik hebbe dus lekker wat in veurraod liggen. Dat vuult goed. Vandemiddag bin ‘k bi’j de Kuunder langes naor Berkoop fietst, daor he’k een koppien drinken had bi’j Peter en Geertje en we hebben genoeglik even bi’jpraot.

Ik kreeg de laeste twie weken weer verschillende kaorten in de busse. Iene van Jan en Klasien van et eilaand Amelaand mit vier zeehonnen d’r op, iene van Frans uut Amsterdam mit Museum Het Schip/De Amsterdamse School d’r op en iene van Jan Berend en Elly vanuut Zeelaand mit I love Zeeland d’r op. Ansichtkaorten bin hier dus hielemaole niet uut de tied. Ik kriege d’r een protte en ik versture an iederiene die mi’j een kaorte stuurt ok een kaorte. Dat is echt vule mooier as appies en mailties en al dat mederne gedoe. Vroeger stuurde ‘k een hieleboel kaorten vanuut oons vekaansieadres tiedens de midweke vekaansie. Dat doe ‘k niet meer, dan zat ik bi’jtieden een aovend te kaorteschrieven en zo. Ik hebbe vanuut Ditzum mar 14 kaorten verstuurd. Aandere meensken kriegen kaorten vanuut aandere plakken a’k daor een dag naor een museum bin of zo. Doe ‘k laestdaegs in Amsterdam was veur et uutreiken van de Zulveren Anjers he’k daor ok 4 ansichtkaorten verstuurd. Niks uut de tied dus. Starker: ik hebbe al een peer jaor een intense en intensieve briefwisseling mit een bekende Friese beeldhouwer. Hi’j schrift mi’j brieven, ik schrieve brieven weeromme. Dat is vule mooier as… appies en mailties. Doe et ok mar es weer! Hieronder de kaorte van Frans vanuut Museum Het Schip in Amsterdam.