Johan Veenstra
Stellingwarver schriever en verteller

Ammarillen

Plaetst op 2 jannewaori 2022.

Op ‘e eerste dag van ’t jaor hael ik al mien ammarillen weer veur ’t locht. Ze hebben dan een vorrels jaor op ‘e zoolder in et pikkedonker staon, zonder dat ze waeter kregen. Gister he’k ze dus ok weer te veurschien haeld. Ik hebbe ze ni’je potgrond en waeter geven. En now mar hopen dat ze haost allemaole weer bluuien gaon. Et lokt mi’j altied hiel goed om dat weer veur mekaander te kriegen. Ik hebbe negen ammarillen, mar ik hebbe now tiene van de zoolder haeld. Ik hebbe naemelik een uutvanhuzer. Omdat et kammeraod Jelle niet zo goed lokken wil en krieg et spul weer in de bluui, heb ik een ammarille van him uutvanhuus. En now mag ik perberen as die bi’j mi’j wel bluuien wil. As dat zo is mag Jelle him vanzels weer hebben. Et is een betien kienderlik, mar now hoop ik toch zo dat me dat lokt! Dan geef ik him op zien verjaordag zien ammarille mit een dikke knoppe d’r in weeromme en dan zeg ik: ‘Och, ie moe’n d’r mit ommegaon kunnen!’
Gisteraovend he’k me slim vermaekt mit de film Downton Abbey. Die he’k een jaormennig leden mit Jan Berend in de bioskoop zien. Netuurlik he’k de serie mit dezelde naeme op ‘e tillevisie ok zien. Prachtig! Deur en deur Engels! Zoe’n kostuumdrama kan allienig mar deur Engelsen maekt wodden. Dat prachtige kesteel, die prachtige kleren… En echt iederiene speult perfekt. De graaf, de butler, de kokkinne…  En dan Maggie Smith as de moeder van de graaf. Fantastisch! Et klopt allemaole. In de bioskoopfilm krigt de femilie Crawley uutvanhuzers op Downton Abbey: keuning George V, zien vrouw Mary, en een hiele flut passeniel. En dat geft nogal wat konsternaosie!