Ammarillen

Et is ni’jjaorsdag en dus he’k mien elf ammarillen uut et pikkeduuster haeld. Daor hebben ze een vorrels jaor staon. Ik hebbe ze ni’je potgrond en waeter geven, dat now verwaacht ik over een weke of wat dat d’r weer knoppen inkommen zullen. Zo gaot et tot now an toe ieder jaor, dat now ja, waoromme zol et me dit jaor dan niet lokken? Daenken pattie dagboeklezeressen d’r ok an dat ze de ammarillen weer veur ’t locht haelen?

En dan nog even over gisteraovend. Et was mar liefst 14½ graod doe ‘k naor Et Vene ree. Nog even en ik kan op Ooldejaorsaovend in de kotte broek naor Haarm en Jacob. We hebben et hiel genoeglik had. We hebben naor Sisi en Claudia de Breij keken en nao middernaacht butendeure naor et siervuurwark boven Et Vene. Ze hadden heerlike happies en draankies en ik hebbe een euliekoeke van heur had. Die ha’k in jaoren niet had, want ik moet gien vet spul hebben. Mar ik hebbe van disse euliebolle gien miskommen had. Ik hebbe daor nog ofwaacht totdat ze in Londen et ni’je jaor ok te pakken hadden en doe bin ‘k weer op huus an gaon. Poes was hiel arg bliede da’k d’r weer was. Ik hadde him in huus opsleuten, zodat hi’j mit al die knalderi’je niet butendeure kommen kon. Ik hebbe him wat snupies geven en doe is hi’j mit me op bedde gaon. Hieronder een foto van gisteraovend. Jacob het Haarm en mi’j op petret zet. Zo te zien kuwwe nog jaoren mit.