Ammarillen (2)

Ik hebbe nog nooit zoe’n groot sukses mit mien ammarillen had as krek dit jaor. Ik hebbe d’r negen en ik kreeg d’r jaors meerstal zesse of zeuven van weer in de bluui. Mar van ’t jaor krie’k ze alle negen weer in de bluui en drieje van de negen ok nog mit twie staelen. Dat is toch wel hiel arg mooi en biezunder. Hier kan ik arg bliede van wodden. Mar de ammarille die ‘k van Jelle kregen hebbe omdat die him niet weer in de bluui kriegen kan, krieg ik ok (nog) niet in de bluui. Mar hi’j mag et ankem jaor weer perberen. Et is vanzels ok niet niks west en verhuus van Sneek naor de Stellingwarven. Zoe’n kultuurschok zal je mar overkommen. Die ammarille moet hier eerst goed wennen en daor krigt hi’j van mi’j alle gelegenhied veur.  Hieronder een foto die ‘k vandaege maekt hebbe van de ammarille die op et ogenblik as eerste van de negen in volle bluui staot. Is et niet een plaetien?