Always the Sea

Doe ‘k een goeie maond leden slim verkolen was, mo’k alderhaande ofspraoken ofzeggen. Die beginne ik now staorigan in te haelen. Zodoende he’k vandemiddag mit Frits luncht in Museum Belvédère in Oranjewoold. We hebben daor eerst wat drinken en een lekkere tosti Belvédère had. En we hebben bi’jpraot, want et was al even leden dawwe mekeer veur et laeste zien hadden. Dat was in et ziekenhuus in Liwwadden. Ze hebben Frits daor aorig te pakken had, mar hi’j is d’r gelokkig goed weer bovenop kommen. Nao et eten hewwe de mooie tentoonstelling Always the Sea mit schilderi’jen van Sámal Joensen-Mikines (1906-1979) bekeken. Hi’j is de meerst bekende schilder van de Faeröer Eilanen, die krek as Gruunlaand diel uut maeken van et Keuninkriek Denemarken. De schilder warkte veurnaemelik op et eilaand Mikines daor hi’j naor nuumd is. Hi’j leut him inspireren deur zien omgeving: de zee, et roege heuvellaandschop, de kaele hellings, de kleine viskersdörpen en de jacht op en de vangst van grienden. Dat bin een soort walvissen uut de dolfijnefemilie. Et was slimme drok in et museum. Al kiekende wodde ik herkend deur een vrouw deurdat mien foto bi’j mien kollums in de kraante staot. Nao et bekieken van de tentoonstelling hewwe nog wat drinken een een hiempien oranjekoeke had. Et was zodoende een mooie middag! Hieronder twie foto’s. Boven: dit is et schilderi’je Zunsondergang van Sámal Joensen-Mikines dat op ‘e tentoonstelling te zien is. Onder: Frits is een geweldig goeie fotograaf. Hi’j gaot vaeke morgens hiel betied de netuur al in. Dit is een zunsopkomst mit gaanzen in netuurgebied De Potschar bi’j et Sneekermeer. Ik wol dat ik zokke mooie foto’s maeken kon!