All Car Meet

Gister stuurde Eddy van der Noord van uutgeveri’je Louise me de drokproef van mien verhael Parredies nog een keer toe. Ik hebbe et nog een keer hielemaole naokeken. D’r is now nog ien woortien dat veraanderd wodden moet. Dat zal Eddy doen. Ik hoeve et niet nog een keer nao te kieken. Et verhael komt in et kedoboek van de Friese Boekeweke 2026.

Wat een verschil mit gister: van 36 naor 22 graoden. Ik was eerst van doel en maek vandaege een fietstocht, mar et regende vandemorgen wat. Singin’ in the Rain (bekende film en lietien uut 1952) is nog wat, mar fietsen in de regen he’k gien aorighied an. Nao et eten was et dreuge en he’k even op ‘e fiets naor Wolvege west om wat bosschoppies. Ik bin bi’j de Lende langes weerommegaon naor huus toe. Ik fietste mit Annie Dedden op. Die was onderweg naor heur kammeraodske in Noordwoolde. Morgen beginnen ze tegere an een fietsvekaansie van twie weken. Ze zullen eerst de kaant van Vorden op!

Komputerkammeraod Jarmo orgeniseert mit een betien hulpe van een peer aanderen van ’t jaor veur de zesde keer All Car Meet in Wolvege. Et is op zundag 6 september. Zie hieronder veur alle infermaosie. Een prachtdag veur autoliefhebbers! De toegaank is vergees. Ik gao d’r ok henne. Ik geve niks om auto’s en ik gao ok niet op et springkussen, mar d’r is me verteld dat d’r ok een snackkarregien staot. Daor gao ik henne om een brotien hamburger of zo. Misschien zie ‘k jim daor wel!