Alkmaar

We bin d’r vandaege even op uut west naor de mooie stad Alkmaar. Aj’ over de Ofsluutdiek willen moej’ now een omweg maeken, omdat de snelweg naor Sneek d’r uutligt. Zoks kan zomar een jaor duren, daenk ik. Op ‘e hennereize biwwe over Jutriep en De Hommerts gaon en op ‘e weerommereize over Oppenhuzen. De weerberichten weren goed veur vandaege. Zunne en dreuge. Daor klopte dus weer niks van. Op ‘e hennereize kregen we al een langdurige en beste glaezewasker. We hebben eerst mit de parreplu op lopen. Laeter was et wel dreuge, mar best wel aorig fris. Iederiene hadde dikke winterkleren an, behalven iene man. Die leup in een kotte broek en een shirtien mit kotte mouwen deur een winkelstraote. Zol zoe’n iene wel deugen? We bin disse keer niet naor een museum west, hebben allienig mar lekker deur de stad kuierd en winkeld. En we hebben heerlik luncht in Mr. Gold. Et was best nog drok mit toeristen, we heurden alderhaande taelen. Omdat et gien mooi fotoweer was, staot d’r gien foto bi’j dit dagboekstokkien.