Alderhaande ni’js

Mien komputerman Jarmo het now ok een mooie website en daor staon al meer as honderd receensies op van hatstikke tevreden klaanten. Et is toch werachtig niet gek aj’ zokke goeie repotciefers kriegen. Zie https://computerservicehofma.nl

Twie dagboeklezers reageerden op et woord voetebehemmelster veur pedicure. Jan O. uut Makkinge mailde me da’k dan ok de mannelike variaant geven moet omdat d’r ok mannelike pedicures binnen. Dat is dan een voetebehemmelder. Bi’j een pedicure daenk ik trouwens in eerste instaansie altied an een vrouw. Jan geft ok as woorden: voetebehaandeler of -ster. En voeteverzorgende. Feike O. uut België mailde me et woord ti’jebuunster. Dat vien ik een mooi woord, mar die vrouw in Noordwoolde het me niet allienig an de ti’jen zeten…

Vandaege he’k plaanten/bloemen kocht bi’j tuuncentrum De Fleurije in Hooltpae. Ik hebbe alles in potten om huus en op et karkhof zet. Now zicht alles d’r mooi uut!

Hieronder een kaorte die ‘k gister toestuurd kreeg van Ingmar en Rahele. Ze weren een dag of wat in Peries en bin ok in Versailles west daor dat prachtige peleis staot. Ingmar schrift: Die dikzak van ’n poes woont daor in de tune as God in Fraankriek. Aachterop ‘e kaorte staot: Seigneur en son royaume. Et is overal etzelde mit katten. Hier is poes Marja de Majesteit van huus en hiem.