Alde Friezen

Dit is een laet dagboekstokkien veur mien doen, mar ik bin krek thuus uut Jorwerd. Daor hawwe vanof half viere vandemiddag de veurjaorsbi’jienkomst van de Alde Friezen. Een gezelschop van meensken die bekend wodden binnen in de Friese sport-, media- en kulturele wereld. We kommen twie keer jaors bi’j mekaander in Het Wapen van Baarderadeel. Een prachtige oolde harbarg. De mystery guest van vandaege was Gerk Koopmans, de vroegere direkteur van et Netuurmuseum in Liwwadden en et Verzetsmuseum van Frieslaand, ok in Liwwadden. En veerder was d’r nog een optreden van zanger Foppe de Lang die begeleided wodde op ‘e piano deur Peter van der Zwaag. Et eten van de ni’je kok was veurtreffelik! Hieronder een internetfoto van Het Wapen van Baarderadeel. Op ‘e bovenverdieping, waor now de grote zael nog is, wo’n drie appattementen bouwd. Et was zokrek wat vervelend autorieden in duuster mit flink wat regen. Mar ik bin weer thuus!