Al weer in Twente

We hebben vandaege een heerlike fietstocht van 33 kilemeter in Twente maekt bi’j de zes kestelen in en om Diepenheim henne. Twie weken leden wa’k ok al mit Haarm, Gé en Gerrit in Deep’n! We hadden daor vandaege prachtig, zunnig fietsweer en hebben eerst wat drinken en een stokkien koeke had bi’j de VVV an de Raodhuusstraote. Nao drie ure vandemiddag betrok de locht en wodde et frisser. Nao et eten was de zunne d’r weer. Ik hadde disse fietstocht ok al es maekt mit Fettje en me donkt ok mit Jelle. Mar et is zoe’n prachtige route deur et wondermooie Twentse laand, dat een dadde keer kon best. We bin bi’j de kestelen Nijenhuis, Weldam, Wegdam, Warmelo, Westerflier en Huis te Diepenheim langesfietst. Nao de fietstocht hewwe waarm eten had bi’j Irma’s. Daor hewwe twie weken leden ok eten. Doe he’k een gehakballe mit petat had. Dat was best wel lekker. Now hewwe elk een schnitzel had. Now, die hewwe argens aanders wel es beter had. Dit ding was slimme vet. Vermoedelik was et frituurd en een goeie schnitzel heurt bakt te wodden. Dat is me deur een kenner van schnitzels verteld. Et is now al laete, daoromme vertelle ik morgen vule meer over de fietstocht. Hieronder alvast een foto van kesteel Nijenhuis daor graaf en gravinne Schimmelpenninck wonen. Morgen vule meer!