Aj’ goed luusteren…

Ik hebbe vandemorgen en vandemiddag verhaelen rippeteerd veur de verschillende optredens van de kommende peer weken. Tussen et rippeteren deur he’k een fietstochien van 24 kilemeter maekt. Et was mooi en zunnig weer. Ik mos d’r now nog van profiteren, de kommende daegen wodt et regenachtig. Ik bin naor Wolvege fietst en mit de beide fietstassen vol bosschoppen bin ‘k bi’j de Lende langes weer naor huus toe gaon. In Wolvege he’k een foto maekt. Mit de opknapbeurt van Wolvege bin d’r allegeer ni’je bloembakken kommen. Op twie bakken staot een zin in et Stellingwarfs. Iene van Harmen Houtman en iene van mi’j. Ik wete niet waor as die van Haarm staot. De bak mit mien zin staot pal tegenover Huze Lindenoord daor now et resteraant van Jan Smink in zit. Vroeger woonde de politikus en schriever jonker Onno Zwier van Haren (1713-1779) hier. In 1760 wodde die beschuldigd deur twie dochters van schaandelik gedrag. Van Haren bekende eerst, mar laeter trok hi’j zien bekentenis weer in. Poletieke tegenstaanders zollen zien dochters onder drok zet hebben om zokke dingen te vertellen. Waor of niet waor? Meensken kun zo gemien wezen as et waeter diepe is. Wat d’r ok waor van was, de poletieke karrière van de jonker was in ien keer veurbi’j. Hi’j was in et vervolg op Lindenoord allienig nog doende mit zien schriefwark. D’r wodde vanzels een protte over praot, roddeld en fluusterd. Mien zin tegenover et mooie, oolde Lindenoord liekt me hiel toepasselik. Aj’ goed luusteren, heur ie et verleden fluusteren.